Quantcast

ನಿನ್ನ ಪ್ರತಿ ಮಾತಲ್ಲೂ ಗೂಡಾರ್ಥ..

shreedevi keremane

ಶ್ರೀದೇವಿ ಕರೆಮನೆ

 

ಕಣ್ಣಂಚಿಂದ ಜಾರಿದ ಹನಿಯ ಹಿಡಿದಿಡಲಾಗದೆ ಬರೆಯುತ್ತಿದ್ದೇನೆ

ಎದೆಯೊಳಗೆ ಹಚ್ಚಿಟ್ಟ ಪುಟ್ಟ ಹಣತೆ ಆರದಿರಲೆಂದು ಬರೆಯುತ್ತಿದ್ದೇನೆ

 

sheನಿನ್ನ ಪ್ರತಿ ಮಾತಲ್ಲೂ ಗೂಡಾರ್ಥ ಹೆಡೆಯೆತ್ತಿ ತೊನೆಯುತ್ತಿರುವಾಗ

ಎರಡು ಸಾಲುಗಳ ನಡುವಿನ ಅರ್ಥ ಹುಡುಕಲೆಂದು ಬರೆಯುತ್ತಿದ್ದೇನೆ

 

ಹೊಕ್ಕಳ ಸುಳಿಯಲ್ಲೇ ಎದ್ದೇಳುವ ತಲ್ಲಣದಲ್ಲೊಂದು ತಂಪ ಹುಡುಕುತ್ತ

ಬದುಕು ಗಿರಗಟ್ಟೆ ಆಡಿಸಬಹುದೆಂಬ ಭಯದ ನೆರಳಲ್ಲಿ ಬರೆಯುತ್ತಿದ್ದೇನೆ

 

ನಿದ್ದೆಯಿಲ್ಲದ ರಾತ್ರಿಯಲ್ಲೂ ಕನವರಿಕೆಗಳು ತಡೆಯಿಲ್ಲದೇ ಸಾಗುವಾಗ

ನಾಳಿನ ಎಲ್ಲಾ ಕನಸುಗಳ ಗುರಿ ನೀನೇ ಆಗಿರಲೆಂಬಂತೆ ಬರೆಯುತ್ತಿದ್ದೇನೆ

 

ಬರೆದು ಮುಚ್ಚಿಟ್ಟ ಸಾಲುಗಳು ‘ಸಿರಿ’ಯ ಸಾವಿನ ನಂತರವಾದರೂ

ನಿನ್ನೊಳಗೊಂದು ಕೋಲ್ಮಿಂಚು ಹಬ್ಬಿಸುವ ಧನ್ಯತೆಗಾಗಿ ಬರೆಯುತ್ತಿದ್ದೇನೆ

3 Comments

  1. ನೂತನ ಎಮ್ ದೋಶೆಟ್ಟಿ
    August 16, 2016
  2. ಚಲಂ
    August 16, 2016
  3. Sangeeta Kalmane
    August 16, 2016

Add Comment